如何在Facebook Page建立自己的自動回覆機械人?

自動回覆機械人/聊天機械人/ChatBot，呢樣野我相信對大家唔會陌生，今年香港亦玩到遍地開花。自2016年開始係一個偶然嘅機會下，我就接觸到Facebook嘅ChatBot。當時市場上冇咩ChatBot公司可以選擇，大多都只有外國同少量台灣公司有提供呢個服務。

外國/台灣/本地ChatBot都一樣？

聽落唔同國家嘅ChatBot呢樣野好似唔係好緊要，就應該唔洗咁著緊。但其實啱啱相反，因為ChatBot佢其中一樣好重要嘅功能，就係認字。雖然外國嘅ChatBot好多時都會比亞洲區經驗多，但我地都唔可以忽視台灣做出來的ChatBot。其實台灣同我地香港一樣都係用繁體中文字，加上佢地嘅電商 [E-commerce]比香港已經行得前同競爭都好大，所以就經驗同技術上亦唔會比香港差。而講返繁體中文呢個問題，其實對於好多外國嘅ChatBot係一個好頭痛問題黎。因為佢地認繁體中文嘅能力唔係你地想像中咁好，加上其實我地香港人嘅語言出曬名難搞。香港人講野同打字，好多時都中英夾雜[e.g. 我想call車]，所以邊個國家出嘅ChatBot都係其中一個考慮因素。但ChatBot近呢幾年都發展得好快，繁體中文呢個問題都慢慢開始減少。

ChatBot功能知多少？

要建立ChatBot前，最基本都要知道佢有啲咩功能先。雖然呢樣唔係一個高智能嘅工具，但只要你識得用得好，一件簡單嘅工具都可以變得好有用。首先我介紹下佢有咩基本功能先：

1. 自動回覆留言

大家玩Facebook都會見到有人叫留言「+1」、「想要」等等字眼嘅帖文，而佢地好多時都可以秒覆你。到底係唔係有個人7×24咁，每日全天候睇住個Facebook，同時用極高速度去回覆所有人？呢個根本冇咩可能發生嘅事黎，但ChatBot就可以幫助你處理呢件事情。

不論你留咩言，ChatBot都可以自動咁幫你覆返你預設嘅回覆。除此之外，仲可以根據指定Keyword咁回覆指定句子。

2. 自動發私人信息 (Inbox) 比留言者

如果你有主動send inbox比你嘅客人的話，大家都會好明白，呢個動作好多時都會係Copy & Paste。但係ChatBot佢就可以自動將你預設左嘅信息，直接Inbox比留言者。完全係一個慳時間嘅好工具。

3. 自動化、引導性的信息，能更人情化去解決不同問題

其實每天客人嘅問題來來去去都圍繞住價錢、地址、產品資料⋯⋯自動化回覆曬呢啲問題，真係可以慳返好多時間。但單單用以上所講嘅方法回覆客人，其實雙方感覺都是冷冰冰的。而ChatBot佢就可以用一個叫Messeger Tree的功能，將整個對話流程預先設定。使對話變得更流程化，可以一步一步引導客人接收到你的信息。而且，你更可把客人分流，根據佢地不同需要將不同信息比佢地。令信息更符合客人的問題及更人情化。不過呢個已經係比較進階少少嘅功能黎，但如果你掌握到就一定可以幫到你手。

4. 廣發信息

呢個功能，就係好多老闆好鐘意嘅功能。其實每一個Inbox過你嘅客人，ChatBot都會記錄住佢做Subscriber。我地就可以向呢班Subscriber，直接傳送信息。以前我地要send信息比用戶要一個一個send，但而家幾個制就可以一次過send比超過1000人。但因為Facebook本身都好著重用戶體驗，所以呢個功能絕對唔可以發放宣傳信息。