什麼是 Web 3？
好多時我哋提到「Web 3」呢個字，你可能會喺網上search 咗一大堆資料，見到好多唔同嘅解釋。有啲文章甚至會把「Web 3」神化，但實際上，Web 3 最核心嘅理念好簡單：就係「去中心化」。
去中心化，即係話所有事情無需要中間人去管理，變得全透明，全世界都可以見到，就係Web 3的真諦。
比如，我哋可以睇睇Web 1、Web 2 同Web 3 嘅差異。
– Web 1 就似20年前嘅黃頁、搜尋引擎、Xanga（出賣年齡啦），主要係單向式嘅信息傳播。我呢篇Blog，如果單單只係你睇，無法同我互動，咁就算係Web 1。
– Web 2時代，互動變成咗主流。以Meta（前Facebook）為例，喺Web 2 世界裡，大家更注重互動：我今日發個Post，你下一秒就可以留言或者點讚。其他嘅討論區也是類似，俾大家有機會互相交流，這種雙向方式為之 Web 2。
– Web 3，就係喺Web 2 嘅基礎上再進一步，但最大嘅分別就係去中心化及區塊鍵技術。再以Meta 做例子，我哋喺Meta 嘅平台上做嘅所有事，包括上載嘅圖片、影片或帖文，似乎所有事情雖然版權及擁有權都係你的。如果有一日Meta 決定要把你的圖片有所修改，你都是沒法去阻止及操控。
聽落去似乎有啲唔合理，明明係自己嘅東西，但最後嘅決定權唔喺自己手上。去中心化，就係為咗解決呢個問題，令大家或社群或相關持份者可以一齊嚟決定事情的去向。
過去大部份企業做決定或事情都欠缺透明度，所有事情都是公司的某幾個人手上。而他們有沒有修改原有決定都沒有人知。
但在Web 3 世界上資訊會變得更透明化，而議案都會由社群及相關持份者作投票決定出來。將原本集中喺少數人手中嘅權力分散，一倒大家過去老闆決定晒嘅槪念。
Web 3 例子
業主立案法團就係一個生活中嘅Web 3 例子，雖然大廈是由地產商建造出來，但透過賣盤，一個又一個單位分散到不同的業主手中。
而這棟大廈的管理及發展權就會變成各業主來決定。而業主們就會組織法團 (社群)，業主便可以通過投票決定大廈嘅管理事宜，去除了單一人物或單位單方向決定所有事情，並去中心化。這個就是現實中，較容易理解及接近 Web 3 的例子。
你可能會覺得，咁簡單就得？其實Web 3 背後涵蓋咗好多唔同嘅概念，例如51% 攻擊、Blockchain 區塊鏈、Opensource 開源等等。喺呢篇文章裡唔可能講晒所有嘢，如果要全面介紹，可能要寫成萬字文咁長…
Web 3 跟 Web 2 嘅營銷有咩分別？
憑藉我十多年嘅Web 2 營銷經驗，我嚟同大家分享吓兩者之間嘅主要差異。我認為，Web 3 營銷相比Web 2，更加需要深入咁了解目標客戶，並且同佢哋建立更緊密嘅關係。
Web 3 世界都有Social Media、Search、Community、Event 嘅存在，但重點平台同Web 2 時期有所不同。以大家熟悉嘅Social Media 嚟講，喺Web 2 嘅營銷工作中，我哋會好多時間都集中於Facebook 同Instagram。但喺Web 3 嘅世界，不論中文定英文，佢哋更加重視Twitter (現在叫X )。主要原因係大部分項目都會喺Twitter 上發放第一手資訊，所以就慢慢養成咗使用Twitter 嘅習慣。
再講到Community，呢個就真係Web 3 同Web 2 最大嘅分別。以往喺Web 2 嘅工作中，我哋可能只著眼於將產品或工作做好。但喺Web 3 世界，每個成功嘅項目都會有自己嘅社群（Community），而主要嘅溝通工具就係Telegram 同Discord。雖然建立同經營一個社區聽落去好似簡單，但實際上非常有挑戰性。
一個成功嘅社區不應該只係單向發放訊息，而係要定時同客戶進行直接對話，並且同其他社群或項目合辦活動，從而投放更多嘅時間同資源。畢竟，我哋而家係直接接觸End-User，佢哋嘅意見同需求直接影響到產品同項目嘅方向。難聽啲咁講，你嘅客戶就係你老闆，佢哋想要嘅嘢先係最重要。
喺我哋日常生活中，以Community 為核心嘅宣傳已經逐漸普及。最直接嘅例子就係Mirro 嘅Fans Club。佢哋真正體驗緊Community Marketing，有時甚至做得比好多公司更接近Web 3。Fans Club 嘅會員可以投票決定要為偶像做啲咩宣傳，一切變得更加去中心化，大家有更多自主權。如果大家未係好了解發生咩事嘅，就等我好快Update 大家。過去佢地偶像嘅生日會，Fans Club 會自己出錢落廣告同大家分享自己偶像生日，但眾多平台去邊度落先好呢？佢地就會透過投票來決定。
講咗咁多，你會發現其實無論係Web 2 定Web 3，營銷嘅核心元素其實無太大變化，只不過方法同目的變得更回歸初心「以客戶為主導，聆聽佢哋嘅需求，再去創造佢哋想要嘅產品。」
加上Web 3更著重於表現（Performance）嘅衡量，我哋喺做營銷嘅時候，就離唔開整個銷售漏斗（Funnel）嘅策略。久而久之，你就會發現 Web 3 Marketing 的工作很多時候都會開發晒你認識及你未認識的Markeing 技能。
Web 3 工作的前境又如何
好多信任Web 3 同加密貨幣（Crypto）嘅人都會話「Web 3係未來嘅大趨勢」。雖然呢句話聽落去可能有啲老生常談，好似「我覺得 Digital 係黎緊大趨」咁，講到小學生都識用 ChatGPT 時都仲講緊。
雖然我啱啱係講笑，但都要了解返咁到底大趨勢，個趨勢係邊度呢。
記得2021 年嗰陣，NFT 突然喺市場上爆紅。名人、KOL、各種品牌都爭相推出自己嘅NFT。如果當時你有參與，應該體驗過佢哋嘅Roadmap、開錢包、搵方法入金等等。嗰時政府尚未有明確嘅監管政策，好多公司都只係將NFT用作營銷宣傳，好似「人有我有，唔跟就落後」咁。但就算只係呢個層面，都已經創造咗好多圍繞NFT 嘅Marketing 職位。
而家，隨著各國政府開始積極推動Web 3 產業，大企業對Web 3 產業嘅信心增強，進一步投入資源。雖然現時Web 3 大部分都同金融產業掛鉤，但已經有大企業開始建立自己嘅Web 3 團隊，投身及建立非金融類嘅項目。
例如CoffeDAO 就係一個實質例子，係某大公司旗下嘅項目，目標係將唔同嘅咖啡小店連繫埋一齊，形成一個社區，透過互相聯繫同資源共享幫助小店。
雖然Web 3 工作嘅前境充滿未知數，但正因為有咁多未知同未有人做過嘅領域，所以潛力巨大。不安、不穩定同不確定性係呢個行業嘅特色，但經歷過之後，我更加明白，變化係永恆，穩定同安逸反而可能係隱藏風險。
保持隨時準備迎接變化嘅心態，積極面對、接受同調整，其實係最穩妥嘅做法。如果你真係有意投身呢個行業，就要做好心理準備，面對極速變化同多變嘅環境。如果你覺得自己適合呢種快節奏同充滿挑戰嘅行業，不妨一試！
如何找到第一份Web 3 工作入行
想搵到第一份Web 3工作，首先要明白，Web 3行業就好似任何新興領域一樣，係充滿機會嘅地方。如果你有意入行，可能一開始係「白紙一張」，但機會其實隨處可尋。
首先，傳統嘅求職網站，例如JobsDB，已經開始刊登不少Web 3 相關嘅工作機會。除此之外，專門嘅網站，如Dejob，更加專注於Web 3 行業嘅職位。如果呢啲仲唔夠，你可以考慮去大型交易所嘅網站（例如Binance, Hashkey, Okx, Bybit 等）直接尋找工作機會，因為呢啲機構對人才嘅需求通常都好大。另一個方法係主動向項目方自薦，喺我身邊認識嘅人當中，真係有唔少成功嘅例子。
當然，不論用咩方法，準備工作都非常重要。如果你打算投身Web 3行業，就必須花時間了解更多相關知識，例如Blockchain嘅基礎、不同嘅鏈有咩分別、Metamask係乜嘢、BTC同ETH嘅分別等等。呢啲知識會幫助你更好地理解行業，同埋判斷自己係咪真係適合呢個行業。
