ChatGPT出世2年多，AI喺Digital Marketing嘅6大實際應用

ChatGPT問世已經兩年多，人工智能（AI）為Digital Marketing帶來咗好大嘅改變。作為一個經常運用AI嘅Digital Marketer，我想同大家分享AI喺實際工作中嘅應用，等大家都可以提升工作效率。

內容目錄

AI喺Digital Marketing嘅現況

早前同一位老闆朋友傾偈，佢分享咗佢公司用AI嘅經驗：

“作為老闆我用AI真係好初階，有用下Poe去執下email同deck嘅英文，都會用嚟分析下數據，但唔係好有系統咁用，亦無令我哋嘅工序好自動化咁。其實都想精進下自己嘅AI知識，都知未來大勢一定係AI，但成日忙住做各種唔同嘅工作、湊客、HR野呢d，知道AI會幫到手改善效率，但成日開咗個頭又死唔起心肝真係學同諗點樣改善。”

呢個分享令我更加想同大家講下我嘅經驗。因為近呢半年我將AI應用落實際工作，由整合網上資訊快速產出內容，到減少每日需要花大量時間嘅dirty work等等，真係大大提升咗工作效率。

舉個例子，以前寫篇blog post可能要成個星期，而家用AI幫手最少慳兩三日時間。又或者做market research，以前要花大量時間上網搵資料、整理、分析，而家AI可以幫手快速總結同比較唔同來源嘅資訊，等我可以更快咁制定策略。

但要記住，用AI唔係開外掛，仲係要配合適當嘅KPI同OKR先可以做到咁多嘢。我唔係想話自己有幾勁，而係想表達用AI工作效率真係大大提升，但中小企老闆又唔好諗住用咗AI就可以Cut人，反而我哋應該要有個更好嘅Mindset，諗下點樣提升工作效率，點樣做啲更Valuable嘅嘢。

如果想知KPI同OKR係咩嚟，就可以睇返我之前寫過嘅文 (Digital Marketing 工作是否只為 KPI 而活？)。講返今次重點，AI。到底可以點樣幫大家提升更多嘅工作效率呢，係呢篇文我將會盡力分享。

AI工具概覽：優勢與局限

首先我哋要了解下幾個常用AI工具嘅優缺點：

AI工具	優勢	局限
ChatGPT & Gemini	可以上網搜尋最新資訊語言處理能力強，適合內容創作	缺乏常識，有時會畀出唔啱嘅答案 [1] 可能產生錯誤或虛構嘅資訊 [3] 回答質素靠你問得好唔好 [3] 有潛在嘅偏見問題 [4]
Claude	回答更加謹慎，錯誤資訊較少文字生成好流暢，啱寫長篇內容	冇得上網搵最新資訊 [2] 客製化選項唔多 [2]
Midjourney	好勁嘅圖像生成能力	生成嘅圖像可能細節唔夠 [4] 風格一致性仲可以再改善 [4]

AI喺Digital Marketing嘅6大實際應用

而家等我同大家分享AI喺Digital Marketing嘅6個實際應用場景。

1. 社交媒體內容創作

寫Social Post初稿嘅時候，我嘅做法係：

畀幾個Reference同過去嘅Post畀AI學習
提供產品賣點同促銷資訊
要求AI用我哋嘅風格寫3個唔同角度嘅Post

例子：


Prompt 1: 請分析及參考以下嘅寫作風格同記錄我過去嘅Social Post，並確保之後嘅產出同我過去嘅Social Post保持一致性。
[插入參考資料同過往Post]

Prompt 2: 以下係我呢次要寫嘅產品資訊，請用我哋嘅風格寫3個唔同角度嘅Social Post
產品賣點：[插入產品賣點]
促銷資訊：[插入促銷資訊]
Call-to-Action：[插入CTA]

用呢個方法可以得到一個完成度超過50%嘅初稿，之後只需要簡單修改就可以用。

2. 數據分析同報告生成

以前做Report要喺Excel度搞好耐，而家只要將Raw Data上傳去ChatGPT就可以幫手分析。但要記住，一定要得到公司同意先可以上傳數據，因為上傳咗ChatGPT公司就會Save咗啲數據。

例子：
將過去3年嘅E-commerce raw data上傳去ChatGPT，然後可以問：

比較3年嘅中秋節產品嘅Total GMV/單量/AOV/Top 3 Hero Items
列出呢3年LTV最高果50位客人，要包括佢哋嘅Email同電話

呢個方法可以將以前要用半日到成日嘅分析工作縮短到幾分鐘。

3. Excel Formula達人

雖然識用Vlookup/Sumif等Formula已經好叻，但點都會遇到一啲時候你知道啲Data要喺Excel點計/想要咩，但就唔知有冇Formula可以做到同點用，呢個時候就可以問AI叫佢畀Formula你。

4. SEO內容快速創作

好多品牌做唔到SEO最大原因係冇內容。用AI可以幫手快速產生內容：

定義Content pillars同關鍵字
諗好文章重點同核心訊息
要求AI生成SEO友好嘅文章初稿

AI會幫你執好排版同基本SEO結構，雖然佢幫到嘅程度可能只有50%，但已經可以大大加快內容產出嘅速度。

5. PDF轉文字

有時收到嘅PDF文件copy唔到文字，呢個時候將成個PDF放入AI，叫佢Output返文字就得。

6. 新聞解析同二次創作

將你睇到嘅新聞/文章連結放到ChatGPT叫佢理解translate同重新編寫Social Post / 文章，咁如果你係做自媒體嘅就可以快速用到。

總結：AI係工具，創意係關鍵

AI呢個課題近年真係好具爭議性，有人支持有人反對。但我覺得AI其實係幫助大家工作而出現，連發明AI嘅人一開始都唔係諗住用AI取代人類工作。

最重要嘅係點樣將AI加入我哋嘅創意工作，呢個就需要大家發揮創意去諗同試。最後，希望大家可以善用AI嚟提升工作效率，但同時都要記住AI只係工具，最重要嘅仲係我哋自己嘅創意同策略思維。